ಪ್ರವೇಶೋತ್ಸವ 2012-2013
         ನೂತನ ಶೈಕ್ಷಣಿಕ ವರ್ಶದಲ್ಲಿ  ಪ್ರವೇಶೋತ್ಸವವು ವಿಘ್ನ ನಿವಾರಕನಾದ ಗಣಪತಿ ಹವನದೊಂದಿಗೆ ವಿಜ್ರುಂಭಣೆಯಿಂದ ಜರಗಿತು. ಸ್ವಾಮಿ ವಿವೇಕಾನಂದರ ವೇಷಧಾರಿಯ ನೇತೃತ್ವದಲ್ಲಿ ಬೊಂಬೆ ಕುಣಿತ,ಜೋಕರ್ ಹಾಗೂ ಇನ್ನಿತರ ವೇಷಗಳ ಭವ್ಯ ಮೆರವಣಿಗೆಯಲ್ಲಿ ನವಾಗತರನ್ನು ಶಾಲೆಗೆ ಕರೆತರಲಾಯಿತು.ಬಳಿಕ ಶಿಕ್ಷಕಿಯರಾದ ಶ್ರೀಮತಿ ಗೀತಾ ಮತ್ತು ಗೀತಾಂಜಲಿಯವರು ಆರತಿ ಬೆಳಗಿ ಪುಟಾಣಿ ಮಕ್ಕಳನ್ನು ಸ್ವಾಗತಿಸಲಾಯಿತು.

ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಶಾಲಾ ರಕ್ಷಕ ಶಿ ಕ್ಷಕ ಸಂಘದ ಅಧ್ಯಕ್ಷ ಶ್ರೀವಿವೇಕಾನಂದ ಬಿ.ಕೆ.ಯವರು ವಹಿಸಿದ್ದರು.ವಾರ್ಡ್ ಸದಸ್ಯ ಶ್ರೀ ರವಿ.ಕೆ.ಯವರು ಕಾರ್ಯಕ್ರಮಕ್ಕೆ ಶುಭ ಕೋರಿದರು.ಶಾಲಾ ವ್ಯವಸ್ಥಾಪಕ ಶ್ರೀಹೃಷಿಕೇಶ ವಿ.ಎಸ್.ಉಪಸ್ಥಿತರಿದ್ದರು.ಈ ಸಂದರ್ಭದಲ್ಲಿ ನೂತನ ಮಕ್ಕಳಿಗೆ ಬ್ಯಾಡ್ಜ್ ,ಬ್ಯಾಗ್,ಪುಸ್ತಕ, ಹಾಗೂ ವಿದ್ಯಾಭಿಮಾನಿ ಶಿರಂತಡ್ಕ ಗಣಪತಿ ಭಟ್ ರವರ ವತಿಯಿಂದ ಸ್ಲೇಟು ಮತ್ತು ಬಳಪ ವಿತರಿಸಲಾಯಿತು.ಪಿ.ಟಿ.ಎ.ಅಧ್ಯ ಕ್ಷರ ವತಿಯಿಂದ ಸಿಹಿ ತಿಂಡಿ ವಿತರಣೆಯಾಯಿತು.ಮುಖ್ಯೋಪಾಧ್ಯಾಯ ಶ್ರೀ ಕೆ.ವೈ.ಸುಬ್ರಹ್ಮಣ್ಯ ಭಟ್ ಸ್ವಾಗತಿಸಿ ಶಿಕ್ಷಕಿ ಶ್ರೀಮತಿ ಗೀತಾಕುಮಾರಿ ವಂದಿಸಿದರು.ಹೆತ್ತವರ ಸಹಭಾಗಿತ್ವದೊಂದಿಗೆ ಕಾರ್ಯಕ್ರಮವು ಉತ್ತಮವಾಗಿ ಮೂಡಿಬಂತು.
   

 

SCHOOL ACTIVITIES 2012 - 13

 ಹಿರಿಮೆ 2011-2012

              ತಾರೀಕು 24-03-2012ನೇ ಶನಿವಾರದಂದು ಎಸ್.ಎನ್.ಎಲ್.ಪಿ. ಪೆರ್ಲದಲ್ಲಿ ಜರಗಿದಎಣ್ಮಕಜೆ ಪಂಚಾಯತು ವ್ಯಾಪ್ತಿಯ 17 ಶಾಲೆಗಳ ಹಿರಿಮೆ ಕಾರ್ಯಕ್ರಮದಲ್ಲಿ ನಮ್ಮ ಶಾಲೆಯ "ಸ್ತ್ರೀಸಬಲೀಕರಣ" ಎಂಬ ಮಂಡಲಕ್ಕೆ ಸಂಬಂಧಿಸಿ ಈ ಶೈ ಕ್ಷಣಿಕ ವ ರ್ಷದಲ್ಲಿ ನಡೆಸಿದ ಚಟುವಟಿಕೆಗಳ ಬಗ್ಗೆ ಉತ್ತಮ ಪ್ರಬಂಧವನ್ನು ಮಂಡಿಸಿದ್ದು ,ಪಂಚಾಯತು ಮಟ್ಟದಲ್ಲಿ ಅತ್ತ್ಯುತ್ತಮ ಶಾಲೆ ಎಂಬ ಕೀರ್ತಿಗೆ ಭಾಜನವಾಗಿದೆ.ಶಾಲೆಯ ಎಲ್ಲಾ ಅಧ್ಯಾಪಕರು ಮತ್ತು 11 ಮಂದಿ ವಿದ್ಯಾರ್ಥಿನಿಯರು ಈ ಕಾರ್ಯಕ್ರಮದಲ್ಲಿ  ಭಾಗವಹಿಸಿದ್ದರು. ಮಂಡಲಕ್ಕೆ ಸಂಬಂಧಿಸಿ ಮಾಡಿದ ಚಟುವಟಿಕೆಗಳ ಸ್ಲೈಡ್ ಶೋ,ಸಾಬೂನು ತಯಾರಿ,ಮುತ್ತು ಮಾಲೆ,ಹೊಲಿಗೆ ತರಬೇತಿಯ ಉತ್ಪನ್ನಗಳು,ಶಾಲಾ ತರಕಾರಿ ತೋಟದಲ್ಲಿ ಬೆಳೆದ ಬದನೆ,ತೊಂಡೆ,ಬಸಳೆ,ಪಡುವಲಗಳನ್ನು ಪ್ರದರ್ಶಿಸಿ ಮಾರಾಟ ಮಾಡಲಾಯಿತು.ತೀರ್ಪುಗಾರರಾಗಿ ಸಹಕರಿಸಿದ ಪಂಚಾಯತು ಉಪಾಧ್ಯಕ್ಷೆ ಶ್ರೀಮತಿ ಆಯಿಶಾ ಪೆರ್ಲ,ಪಂಚಾಯತು ಸದಸ್ಯೆ ಶ್ರೀಮತಿ ಶಾರದಾ ಮೇಡಂ ಮತ್ತು ಸಿ.ಆರ್.ಸಿ.ಸೆಕ್ರೆಟರಿ ಶ್ರೀದೇವದಾಸ್ ಕಜಂಪಾಡಿ ಅವರು ಸ್ಪರ್ಧಾತ್ಮಕವಾಗಿ ಜರಗಿದ ಹಿರಿಮೆ ಬಗ್ಗೆ ಅಭಿಪ್ರಾಯಗಳನ್ನು ಪ್ರಕಟಿಸಿದರು.

                    ಶಾಲಾ ಶೈ ಕ್ಷಣಿಕ ಪ್ರವಾಸ ಮಾರ್ಚ್ 09
ತಾರೀಕು 09-03-2012ನೇ ಶುಕ್ರವಾರ ಬೆಳಗ್ಗೆ ನಮ್ಮ ಶಾಲೆಯಿಂದ ನಿಗದಿ ಪಡಿಸಿದ "ಮಹಾಲಕ್ಷ್ಮೀ" ಬಸ್ಸಿನಲ್ಲಿ ಅಧ್ಯಾಪಕರು, ವಿಧ್ಯಾರ್ಥಿಗಳು ಮತ್ತು ಹೆತ್ತವರು ಒಟ್ಟು 98 ಮಂದಿ ಒಂದು ದಿನದ ಶೈ ಕ್ಷಣಿಕ ಪ್ರವಾಸ ಹೊರಟೆವು. 
ಶಾಲಾ ಮುಖ್ಯೋಪಾಧ್ಯಾಯರು ತೆಂಗಿನಕಾಯಿ ಒಡೆಯುವ ಮೂಲಕ ಕಣ್ಣೂರಿನ "ವಿಸ್ಮಯ ಪಾರ್ಕ್"ಪ್ರವಾಸಕ್ಕೆ ಚಾಲನೆಯಿತ್ತರು.
             ಬಸ್ಸಿನಲ್ಲಿ ಹಾಡು,ಕುಣಿತಗಳೊಂದಿಗೆ ಮಜಾ ಮಾಡಿದ ಮಕ್ಕಳು ೮-೩೦ಕ್ಕೆ ನೀಲೇಶ್ವರದಲ್ಲಿ ಬೆಳಗಿನ ಉಪಾಹಾರ ಸ್ವೀಕರಿಸಿದೆವು.10-30ಕ್ಕೆ ಸರಿಯಾಗಿ ನಾವು ಪರಶಿನಕಡವು ಉರಗೋದ್ಯಾನವನ್ನು ಸಂದರ್ಶಿಸಿದೆವು.ಅಲ್ಲಿ ವಿವಿಧ ತರದ ಪ್ರಾಣಿಗಳು,ಪ ಕ್ಷಿಗಳು,ಮತ್ತು ನಾನಾ ವಿಧದ ಉರಗಗಳನ್ನು ನೋಡಿ ಸಂತಸಪಟ್ಟೆವು.
         11-15ರಿಂದ ಸಾಯಂ ಗಂಟೆ 5-೦೦ರ ತನಕ ವಿಸ್ಮಯ ಪಾರ್ಕ್ ನಲ್ಲಿರುವ ಜಾರುಬಂಡಿಗಳು. ಟೂಬುಗಳು,ಮ್ಯೂಸಿಕಲ್ ಫಾಲ್ಸ್,ಫಿಶ್,ಟ್ರೈನ್,ಕಾರ್,ಭೂತ ಬಂಗಲೆ,4ಡಿ ಸಿನೆಮಾ ಇತ್ಯಾದಿ ಸಾಹಸಮಯವಾದ ಆಟಗಳಲ್ಲಿ ಭಾಗವಹಿಸಿ ಖುಷಿಪಟ್ಟೆವು.ಅಧ್ಯಾಪಕರು,ಹೆತ್ತವರು ಮಕ್ಕಳಾಗಿ ಆಡಿದ ಆಕ್ಷಣ ಎಂದಿಗೂ ಮರೆಯಲು ಸಾಧ್ಯವಿಲ್ಲ.

                     ಶಾಲಾ ಮಟ್ಟದ ಸಹವಾಸ ಶಿಬಿರ 'ಸಂಭ್ರಮ' 
   
         ಸರ್ವಶಿಕ್ಷಾ ಅಭಿಯಾನದ ಆಶ್ರಯದಲ್ಲಿ ಶಾಲಾ ಮಟ್ಟದ ದ್ವಿದಿನ ವಾಸ್ಥವ್ಯ ಶಿಬಿರವು ಸ್ವರ್ಗದ ಸ್ವಾಮಿ ವಿವೇಕಾನಂದ ಎ.ಯು.ಪಿ.ಶಾಲೆಯಲ್ಲಿ ಮಾರ್ಚ್ 2 ಮತ್ತು 3 ರಂದು ಉತ್ತಮವಾಗಿ ಜರಗಿತು.ಎಣ್ಮಕಜೆ ಗ್ರಾಮ ಪಂಚಾಯತಿನ ಸ್ಥಾಯೀ ಸಮಿತಿ ಸದಸ್ಯರಾದ ಶ್ರೀಯುತ ಬಿ.ಎಸ್.ಗಾಂಬೀರ್ ರವರು ದೀಪ ಜ್ವಾಲನೆಯೊಂದಿಗೆ ಶಿಬಿರವನ್ನು ಉದ್ಘಾಟಿಸಿದರು.ರಕ್ಷಕ ಶಿಕ್ಷಕ ಸಂಘದ ಉಪಾಧ್ಯಕ್ಷೆ ಶ್ರೀಮತಿ ಜಯಶೀಲ ಸ್ವರ್ಗ ಅಧ್ಯಕ್ಷತೆ ವಹಿಸಿದ್ದರು.ಸ್ಥಳೀಯ ವಾರ್ಡ್ ಸದಸ್ಯ ರವಿ ಕೆ ಅವರು ಕಾರ್ಯಕ್ರಮಕ್ಕೆ ಶುಭಾಶಂಸನೆಗೈದರು.ಶಾಲಾ ಮುಖ್ಯೋಪಾಧ್ಯಾಯ ಶ್ರೀ ಕೆ.ವೈ.ಸುಬ್ರಹ್ಮಣ್ಯ ಭಟ್ಟರು ಸ್ವಾಗತಿಸಿ,ಶಿಕ್ಷಕ ಸಚ್ಚಿದಾನಂದರು ವಂದಿಸಿದರು.ವಿದ್ಯಾರ್ಥಿನಿ ಕು/ರಶ್ಮಿ ಎಸ್.ಜಿ.ಕಾರ್ಯಕ್ರಮ ನಿರೂಪಿಸಿದಳು.  
       ಸಂದರ್ಶನ-ವಿವರಸಂಗ್ರಹ-ವರದಿ ತಯಾರಿ-ಎಂಬ ಮುಖ್ಯ ಉದ್ದೇಶವನ್ನಿರಿಸಿ ನಡೆಸಿದ ಈ  ಶಿಬಿರದಲ್ಲಿ ಪೆರ್ಲದ ಅನುಪಮ ಗಂಗಾ ಫಾರ್ಮ್ಸ್ ಎಂಬ ಹೈನುಗಾರಿಕಾ ಘಟಕಕ್ಕೆ ಭೇಟಿ ನೀಡಲು ಅಗತ್ಯವಾದ ಪ್ರಶ್ನೆಗಳನ್ನು ಮಕ್ಕಳು ಗುಂಪಿನಲ್ಲಿ ತಯಾರಿಸಿದರು.ಅಲ್ಲಿನ ಹೈಟೆಕ್ ಹಟ್ಟಿಯಲ್ಲಿರುವ 25 ರಾಸುಗಳು,ನೀರು ಕುಡಿಯುವ ವ್ಯವಸ್ಥೆ,ಹಾಲು ಕರೆಯುವ ಮಿಶನುಗಳನ್ನು ಪ್ರತ್ಯಕ್ಷ ನೋಡಿ ಮಾಹಿತಿ ಸಂಗ್ರಹಿಸಿ,ಪ್ರತಿಯೊಂದು ಗುಂಪಿನಿಂದಲೂ ವರದಿ ಮಂಡಿಸಲಾಯಿತು.
ಶಿಕ್ಷಕ ಪದ್ಮನಾಭರ ನೇತೃತ್ವದಲ್ಲಿ ನಿರ್ಮಾಣಗೊಂಡ ಗಾಳಿಪಟವನ್ನು ಸಮೀಪದ ತೂಂಬಡ್ಕ ದಲ್ಲಿ ಎತ್ತರೆತ್ತರಕ್ಕೆ ಹಾರಿಸಿ  ಮಕ್ಕಳು ಸಂಭ್ರಮಿಸಿದರು.
               ತೆಂಗಿನ ಮರ ಹತ್ತುವುದು,ತಲೆ ಕೆಳಗೆ ಮಾಡಿ ನಿಲ್ಲುವುದು,ಹಗ್ಗದಲ್ಲಿ ಮರ ಏರುವುದು,ಏಣಿ ಏರುವುದು ಮುಂತಾದ ಸಾಹಸ ಪ್ರದರ್ಶನಗಳು ಮಕ್ಕಳಲ್ಲಿ  ಸಾಧಿಸಿದರೆ ಸಬಳವನ್ನೂ ನುಂಗಬಹುದುಎಂಬ ಭಾವನೆಯನ್ನು ಮೂಡಿಸಿದವ .
             ರಾತ್ರಿ ನಡೆದ ಶಿಬಿರಾಗ್ನಿಯ  ಎಂ.ಪಿ.ಟಿ.ಎ. ಅಧ್ಯಕ್ಷೆ ಶ್ರೀಮತಿ ರಾಧಿಕಾ ಎಡಮಲೆ ಅವರು ಉದ್ಘಾಟಿಸಿದರು.ಅಧ್ಯಾಪಕ ಶ್ರೀ ಸಚ್ಚಿದಾನಂದರು ಶಿಬಿರದ ನೇತೃತ್ವ ವಹಿಸಿದ್ದರು.ಯು.ಪಿ. ವಿಭಾಗದ 66 ಮಂದಿ ಮಕ್ಕಳು ಭಾಗವಹಿಸಿದ ಈ ಶಿಬಿರದಲ್ಲಿ ನಡೆದ ಕ್ರೀಡಾ ಚಟುವಟಿಕೆಗಳು ಮಕ್ಕಳ ಬೌದ್ಧಿಕ ವಿಕಾಸಕ್ಕೆ ಕಾರಣವಾಯಿತು.
                   

              ತಿಲಕ -2012(ಫೆ.24 ಮತ್ತು 25)
                             ದ್ವಿದಿನ ಸಹವಾಸ ಶಿಬಿರ
        ತಾವು ಗಂಡು ಮಕ್ಕಳಿಗಿಂತ ಭಿನ್ನವಲ್ಲ ಯಾವುದೇ ಸಂದರ್ಭದಲ್ಲೂ ಏನು ಕಷ್ಟ ಬಂದರೂ ಧೈರ್ಯ ದಿಂದ ಎದುರಿಸುವೆವು ಎಂಬ ಆತ್ಮ ವಿಶ್ವಾಸವನ್ನು ನಮ್ಮ ಶಾಲೆಯಲ್ಲಿ ಜರಗಿದ ಪಂಚಾಯತು ಮಟ್ಟದ ಹೆಣ್ಣು ಮಕ್ಕಳ ಸಹವಾಸ ಶಿಬಿರದಲ್ಲಿ ಮಕ್ಕಳು ಗಳಿಸಿದರು.  ಮರವನ್ನು ಏರುವುದು, ಹಗ್ಗದಲ್ಲಿ ನೇತಾಡಿ ಮೇಲಕ್ಕೇರುವುದು, ಗೋಡೆ ಹಾರುವುದು, ಏಣಿ ಹತ್ತುವುದು, ಫುಟ್ ಬಾಲ್, ಸೈಕ್ಲಿಂಗ್ ಮುಂತಾದ ಸಾಹಸಮಯ ಚಟುವಟಿಕೆಗಳಲ್ಲಿ ಮಕ್ಕಳು ಉತ್ಸಾಹದಿಂದ ಭಾಗವಹಿಸಿ ತಮ್ಮ ಮಿತಿಗಳ ವಲಯದಿಂದ ಹೊರ ಜಿಗಿದರು.                                                                                                                                                  
 




 

           ಸರ್ವಶಿಕ್ಷಾ ಅಭಿಯಾನದ ಆಶ್ರಯದಲ್ಲಿ ನಡೆದ ಪಂಚಾಯತು ಮಟ್ಟದ ಹೆಣ್ಣು ಮಕ್ಕಳ ದ್ವಿದಿನ ಸಹವಾಸ ಶಿಬಿರವನ್ನು ವಾರ್ಡು ಸದಸ್ಯ ಶ್ರೀ ರವಿ.ಕೆ.ಯವರ ಅಧ್ಯಕ್ಷತೆಯಲ್ಲಿ ಪಂಚಾಯತು ಅಧ್ಯಕ್ಷರಾದ ಶ್ರೀ ಸೋಮಶೇಖರ್.ಜೆ.ಎಸ್.ರವರು ದೀಪ ಜ್ವಾಲನೆಯ ಮೂಲಕ ಉದ್ಘಾಟಿಸಿದರು. ಪಂಚಾಯತು ಉಪಾಧ್ಯಕ್ಷೆ ಶ್ರೀಮತಿ ಆಯಿಷಾ.ಎ.ಎ. ಹಾಗೂ ಕುಂಬಳೆ ಬಿ.ಪಿ.ಓ ಶ್ರೀ ರವೀಂದ್ರ  ಮಾಸ್ತರ್ ರವರು ಮುಖ್ಯ ಅತಿಥಿಗಳಾಗಿ ಪಾಲ್ಗೊಂಡಿದ್ದರು. ಬಿ.ಆರ್.ಸಿ. ತರಬೇತುದಾರ ಶ್ರೀ ಶ್ರೀಹರ್ಷರು ಕಾರ್ಯಕ್ರಮಕ್ಕೆ ಶುಭಾಶಂಸನೆ ಗೈದರು. ಶಾಲಾ ವ್ಯವಸ್ಥಾಪಕ ಹೃಷಿಕೇಶ.ವಿ.ಎಸ್., ಶಿಕ್ಷಕ ರಕ್ಷಕ ಸಂಘದ ಅಧ್ಯಕ್ಷ ಶ್ರೀ ವಿವೇಕಾನಂದ.ಬಿ.ಕೆ., ಮಾತೃ ಸಂಗಮದ ಅಧ್ಯಕ್ಷೆ ರಾಧಿಕಾ ಎಡಮಲೆ ಸಭೆಯಲ್ಲಿ ಉಪಸ್ಥಿತರಿದ್ದರು. ಶಾಲಾ ಮುಖ್ಯೋಪಾಧ್ಯಾಯರಾದ ಕೆ.ವೈ.ಸುಬ್ರಹ್ಮಣ್ಯ ಭಟ್ ಅವರು ಸ್ವಾಗತಿಸಿ, ಪಿ.ಇ.ಸಿ.ಕಾರ್ಯದರ್ಶಿ ದೇವದಾಸ್ ಕಜಂಪಾಡಿ ವಂದಿಸಿದರು. ವಿದ್ಯಾರ್ಥಿನಿಯರಾದ ಶ್ರುತಿ ಹಾಗು ರೇಷ್ಮಾ ಕಾರ್ಯಕ್ರಮ ನಿರೂಪಿಸಿದರು.
      ಡಾ.ಸಪ್ನ ಜಯಗೋವಿಂದ ಉಕ್ಕಿನಡ್ಕ ಅವರಿಂದ ಹೆಣ್ಣು ಮಕ್ಕಳ ಆರೋಗ್ಯ, ಆಹಾರ ಕ್ರಮಗಳ ಬಗ್ಗೆ ತರಗತಿ ನಡೆಯಿತು.ಇದಕ್ಕೆ ಪೂರಕವಾದ ಮಾಹಿತಿಯನ್ನು ಎಲ್.ಸಿ.ಡಿ. ಪ್ರೊಜೆಕ್ಟರ್‌ನಲ್ಲಿ ಪ್ರದರ್ಶಿಸಲಾಯಿತು.
        
       ಶಾಲಾ ಹಳೆ ವಿದ್ಯಾರ್ಥಿನಿ ಕುಮಾರಿ ಮೋಹಿನಿ.ಎಸ್.ಕೆ.ಯವರಿಂದ ರಚನಾತ್ಮಕ ಚಟುವಟಿಕೆಗಳು ಹಾಗೂ ಶ್ರೀಮತಿ ಹೇಮಾವಾಣಿ.ಎಸ್.ಭಟ್. ಪೆರ್ಲ ಇವರೊಂದಿಗೆ ಯಶಸ್ವೀ ಮಹಿಳೆಯೊಂದಿಗೆ ಸಂವಾದ ಕಾರ್ಯಕ್ರಮ ಜರಗಿತು.ರಾತ್ರಿ ನಡೆದ ಶಿಬಿರಾಗ್ನಿಯನ್ನು ಬಾಲ ಕಲಾವಿದೆ ಕುಮಾರಿ ಸನ್ನಿಧಿ ಪೆರ್ಲ ಅವರು ಉದ್ಘಾಟಿಸಿದರು.

 

        ಎಣ್ಮಕಜೆ ಪಂಚಾಯತಿನ ಎಲ್ಲಾ  ಶಾಲೆಗಳ ಯು.ಪಿ ವಿಭಾಗದ 40 ಮಂದಿ ವಿದ್ಯಾರ್ಥಿನಿಯರು ಶಿಬಿರದಲ್ಲಿ ಪಾಲ್ಗೊಂಡರು. ಹೆಣ್ಣು ಮಕ್ಕಳ ಸಬಲೀಕರಣಕ್ಕಾಗಿ ಆಯೋಜಿಸಿದ ಈ ವಾಸ್ತವ್ಯ ಶಿಬಿರವು ಮಕ್ಕಳಲ್ಲಿ ಆತ್ಮವಿಶ್ವಾಸವನ್ನು ಹೆಚ್ಚಿಸಿದುದಲ್ಲದೆ,ಜೀವನ ಪರಿಸ್ಥಿತಿಯನ್ನು ಧೈರ್ಯದಿಂದ ಎದುರಿಸಲು, ತರಗತಿ ಚಟುವಟಿಕೆಗಳಲ್ಲಿ ಉತ್ಸಾಹದಿಂದ ಭಾಗವಹಿಸಲು ಉತ್ತೇಜನವನ್ನಿತ್ತಿತು.
ಎರಡು ದಿನಗಳು ನಿರಂತರ ವ್ಯತ್ಯಸ್ತ ಚಟುವಟಿಕೆಗಳನೊಳಗೊಂಡಿದ್ದು, ಮಕ್ಕಳ ಶಿಬಿರಾವಲೋಕನದೊಂದಿಗೆ
ಮುಕ್ತಾಯಗೊಂಡಿತು.ಶಾಲಾ ಅಧ್ಯಾಪಕ ವೃಂದದವರ ನೆರವಿನೊಂದಿಗೆ ಅಧ್ಯಾಪಿಕೆ ಶ್ರೀಮತಿ ಗೀತಾ ಕುಮಾರಿಯವರು ಶಿಬಿರ ನೇತೃತ್ವ ವಹಿಸಿದ್ದರು.

                                             ಶಾಲಾ ವಾರ್ಷಿಕೋತ್ಸವ             ಬೆಳಗ್ಗೆ ಗಂಟೆ 9.30 ಕ್ಕೆ ಸರಿಯಾಗಿ ಶ್ರೀಯುತ ಅರವಿಂದ ಕುಮಾರ್ , ಸೀನಿಯರ್ ಸುಪರಿಂಟೆಂಡೆಂಟ್ ಎ.ಇ.ಒ.ಆಫೀಸ್,ಕುಂಬಳೆ  ರವರು ಧ್ವಜಾರೋಹಣ ಗೈಯುವ ಮೂಲಕ ಕಾರ್ಯಕ್ರಮಕ್ಕೆ ಚಾಲನೆಯಿತ್ತರು .ಶಾಲಾ ವ್ಯವಸ್ಥಾಪಕರು  ರಕ್ಷಕ-ಶಿಕ್ಷಕ ಸಂಘದ ಅಧ್ಯಕ್ಷ ಶ್ರೀಯುತ ವಿವೇಕಾನಂದ ಬಿ.ಕೆ. ಹಾಗೂ ಅನೇಕ ಮಂದಿ ವಿದ್ಯಾಭಿಮಾನಿಗಳು ಕಾರ್ಯಕ್ರಮದಲ್ಲಿ ಭಾಗಿಗಳಾದರು. ಸಿಹಿತಿಂಡಿ ವಿತರಣೆಯ ಬಳಿಕ ಎಲ್.ಪಿ., ಯು.ಪಿ. ಹಾಗೂ ಅಂಗನವಾಡಿ ಮಕ್ಕಳಿಂದ ಛದ್ಮವೇಷ ಸ್ಪರ್ಧೆ ಜರಗಿತು.

 
        ಅಪರಾಹ್ಣ ಗಂಟೆ ೩.೩೦ ರಿಂದ ಶಾಲಾ ಹಳೆವಿದ್ಯಾರ್ಥಿ ಮೋಹನ ಆಚಾರ್ಯ ಎಸ್.ಕೆ.ಯವರಿಂದ ಟೆಲಿಫಿಲಂ ಪ್ರದರ್ಶನಗೊಂಡಿತು.ಶಾಲಾ ಸಂಗೀತ ವಿದ್ಯಾರ್ಥಿಗಳಿಂದ 15 ನಿಮಿಷದ ಕಾರ್ಯಕ್ರಮದ ಬಳಿಕ 4.30 ರಿಂದ ಸಭಾ ಕಾರ್ಯಕ್ರಮ ಜರಗಿತು.

 

    ಕುಂಬಳೆ ಉಪಜಿಲ್ಲಾ ವಿದ್ಯಾಧಿಕಾರಿಗಳಾದ ಶ್ರೀ ಕರುಣಾಕರ ಅನಂತಪುರ ಅವರ ಅಧ್ಯಕ್ಷತೆಯಲ್ಲಿ, ನೆರೆಯ ವಾಣೀನಗರ ಶಾಲೆಯ ಪ್ರಾಂಶುಪಾಲ ಶ್ರೀ ನಾರಾಯಣ ರಾವ್ ರವರು ಪ್ರಧಾನ ಅಭ್ಯಾಗತರಾಗಿ ಭಾಷಣ ಮಾಡಿದರು.

      ಇದೇ ಸಂದರ್ಭದಲ್ಲಿ ನಮ್ಮೀ ಶಾಲೆಯ ಹಿರಿಯ ವಿದ್ಯಾರ್ಥಿ ಸಾಧಕರಾದ ಶ್ರೀ ಶ್ರೀಧರ ಪಡ್ರೆ (ಯಕ್ಷಗಾನ ಚೆಂಡೆ ಮದ್ದಳೆವಾದಕ), ಶ್ರೀ ಪ್ರವೀಣ್ ಪಿ.ಬಿ.(ಟೆಕ್ನಿಕಲ್ ಅಸಿಸ್ಟಂಟ್), ಶ್ರೀ ಮೋಹನ ಪಡ್ರೆ (ಚಿತ್ರಕಾರ,ಟೆಲಿಫಿಲಂ ನಿರ್ದೇಶಕ) ಶ್ರೀ ಪ್ರಶಾಂತ ಆಚಾರ್ಯ (ಶಿಲ್ಪಿ ಕಾರ್ಕಳ), ಕುಮಾರಿ ಐಶ್ವರ್ಯಾ ಎಸ್.ಕೆ. (ರಿಸರ್ಚ್ ಎಸೋಸಿಯೇಟ್, ಎಪೊಟೆಕ್ಸ್, ಬೆಂಗಳೂರು) ಯವರನ್ನು ಅಭಿನಂದಿಸಲಾಯಿತು.

 

                                                                                        

 

             ಇನ್ನೋರ್ವ ಅತಿಥಿಗಳಾದ ಶ್ರೀ ಬಾಳಿಕೆ ಗಣಪತಿ ಭಟ್ (ಮೇನೇಜರ್, ಇನ್ಫೋಸಿಸ್ ಮಂಗಳೂರು ) ಇವರಿಂದ ಶಾಲಾ ವಾರ್ಷಿಕೋತ್ಸವ ಸಂದರ್ಭದಲ್ಲಿ ನಡೆಸಿದ ಸ್ಪರ್ಧೆಗಳಲ್ಲಿ ವಿಜೇತರಾದವರಿಗೆ ಬಹುಮಾನ ವಿತರಿಸಲಾಯಿತು. 





ಮುಖ್ಯೋಪಾಧ್ಯಾಯರು ಪ್ರಾಸ್ತಾವಿಕ ನುಡಿಗಳೊಂದಿಗೆ ಸ್ವಾಗತಿಸಿ, ಪಿ.ಟಿ.ಎ. ಅಧ್ಯಕ್ಷ ಶ್ರೀ ವಿವೇಕಾನಂದರು ಧನ್ಯವಾದವಿತ್ತರು.
ವಿದ್ಯಾರ್ಥಿನಿಯರಾದ ಕುಮಾರಿ ಶ್ರುತಿ.ಕೆ. ಹಾಗೂ ಕುಮಾರಿ ಚೈತ್ರಾ.ಕೆ.ಯವರು ಕಾರ್ಯಕ್ರಮ ನಿರೂಪಿಸಿದರು.
     ಉಪಾಹಾರದ ಬಳಿಕ ರಾತ್ರಿ ಗಂಟೆ 8.00ರಿಂದ ಮಕ್ಕಳ ಸಾಂಸ್ಕೃತಿಕ ಚಟುವಟಿಕೆಗಳಾದ ನೃತ್ಯ - ನಾಟಕಗಳು ಪ್ರದರ್ಶನಗೊಂಡವು. ಈ ಸಂದರ್ಭದಲ್ಲಿ ನಾಟ್ಯ ಗುರು ಶ್ರೀ ಸಬ್ಬಣಕೋಡಿ ರಾಮಭಟ್ ನಿರ್ದೇಶನದಲ್ಲಿ  ಪಡ್ರೆ ಚಂದು ಸ್ಮಾರಕ ಯಕ್ಷಗಾನ ಕಲಾ ಉಚಿತ ತರಬೇತಿ ಕೇಂದ್ರ ಇದರ ಎಳೆಯ ಕಲಾವಿದರಿಂದ ವೀರ ಬಬ್ರುವಾಹನಯಕ್ಷಗಾನ ಬಯಲಾಟ ನಡೆಯಿತು.   

              
                           

                                       ಕೃಷಿ ಮಾಹಿತಿ ವಿಶೇಷ ಶಿಬಿರ
              ರಕ್ಷಕ - ಶಿಕ್ಷಕ ಸಂಘ, ಮಾತೃ ಸಂಗಮ ಹಾಗೂ ಕಾಸರಗೋಡು ಸಿಪಿಸಿಆರ್‌ಐ ಕೃಷಿ ವಿಜ್ಞಾನ ಕೇಂದ್ರದ ಸಹಯೋಗದೊಂದಿಗೆ  ನಮ್ಮ ಶಾಲಾ ಮಕ್ಕಳಿಗೆ ಹಾಗೂ ಆಸಕ್ತ ಕೃಷಿಕರಿಗೆ ಒಂದು ದಿನದ ಕೃಷಿ ಮಾಹಿತಿ ವಿಶೇಷ ಶಿಬಿರ ಜರಗಿತು.
         
         ಕಾರ್ಯಕ್ರಮವನ್ನು ಖ್ಯಾತ ಪರಿಸರವಾದಿ ಹಾಗೂ ಜಲತಜ್ಞ ಶ್ರೀ ಪಡ್ರೆ ಯವರು ಶಾಲಾ ವಠಾರದಲ್ಲಿ ಬೀಜ ಬಿತ್ತುವ ಮೂಲಕ ಉದ್ಘಾಟಿಸಿದರು. ಎಣ್ಮಕಜೆ ಗ್ರಾಮ ಪಂಚಾಯಿತಿ ಸದಸ್ಯ ರವಿ.ಕೆ. ಅಧ್ಯಕ್ಷತೆ ವಹಿಸಿದ್ದರು. ಎಣ್ಮಕಜೆ ಪಂಚಾಯಿತಿ ಕೃಷಿ ಭವನ ಅಧಿಕಾರಿ ಮೀರಾ.ಎಸ್.ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದರು.ಕಾಸರಗೋಡು ಕೃಷಿ ವಿಜ್ಞಾನ ಕೇಂದ್ರ ಕಾರ್ಯಕ್ರಮ ಸಮನ್ವಯಾಧಿಕಾರಿ ಡಾ.ಮನೋಜ್ ಕುಮಾರ್, ಕೃಷಿ ವಿಷಯ ತಜ್ಞರಾದ ಡಾ.ಎಸ್.ಲೀನಾ, ಶೋಭ.ಎಸ್. ಸಂಪನ್ಮೂಲ ವ್ಯಕ್ತಿಯಾಗಿ ಭಾಗವಹಿಸಿ ತರಕಾರಿ ಕೃಷಿಯ ಬಗ್ಗೆ ಮಾಹಿತಿ ನೀಡಿರರು.
     
        ಈ ಸಂದರ್ಭದಲ್ಲಿ ಎಣ್ಮಕಜೆ ಗ್ರಾಮ ಪಂಚಾಯಿತಿ ಅಧ್ಯಕ್ಷ ಸೋಮಶೇಖರ ಜೆ.ಎಸ್. ಕೊಡುಗೆಯಾಗಿ ನೀಡಿದ ಸ್ಪ್ರೇಯರ್‌ನ್ನು ಕೃಷಿ ಅಧಿಕಾರಿ ಮೀರಾರವರು ಶಾಲೆಯ ಇಕೋ ಕ್ಲಬ್ ಸದಸ್ಯ ಪ್ರಸನ್ನ ಕುಮಾರ್.ಬಿ ಅವರಿಗೆ ಹಸ್ತಾಂತರಿಸಿದರು.ಶಾಲಾ ಮುಖ್ಯ ಶಿಕ್ಷಕ ಕೆ.ವೈ.ಸುಬ್ರಹ್ಮಣ್ಯ ಭಟ್ ಪ್ರಾಸ್ತಾವಿಕ ನುಡಿಗಳೊಂದಿಗೆ ಸ್ವಾಗತಿಸಿದರು. ವಿದ್ಯಾರ್ಥಿನಿ ಮಾಳವಿಕಾ.ಎಸ್. ಕಾರ್ಯಕ್ರಮ ನಿರೂಪಿಸಿದರು.ಶಿಕ್ಷಕ ಎಸ್.ಎನ್.ವೆಂಕಟ ವಿದ್ಯಾಸಾಗರರು ವಂದಿಸಿದರು.

                      
                      ವಿವೇಕಾನಂದ ಜಯಂತಿ 
        ಏಳನೇ  ತರಗತಿಯ  ವಿದ್ಯಾರ್ಥಿನಿ ಕುಮಾರಿ ಮೇಘಾ.ಎಸ್.ಎಮ್.ರವರು ವಿವೇಕಾನಂದರಾಗಿ ತಾನು ಚಿಕಾಗೋ ನಗರದಲ್ಲಿ ಮಾಡಿದ ವಿಶ್ವ ಪ್ರಸಿದ್ಧಗೊಂಡ ಭಾಷಣದ ಅಣಕು  ಪ್ರದರ್ಶನವನ್ನು ಶಾಲಾ ಅಸೆಂಬ್ಲಿಯಲ್ಲಿ ಪ್ರದರ್ಶಿಸಿದರು. ಈ ಸಂದರ್ಭದಲ್ಲಿ ಶಾಲಾ ಮುಖ್ಯೋಪಾಧ್ಯಾಯರು ವಿವೇಕಾನಂದರ ಜೀವನ ಆದರ್ಶಗಳನ್ನು ವಿವರಿಸಿ ಮಕ್ಕಳಲ್ಲಿ ಸ್ಫೂರ್ತಿ ತುಂಬಿದರು. 

                      Spoken English Class   (December 26 to 30)

         ಮಾತುಗಾರಿಕೆಯಲ್ಲಿ ಇಂಗ್ಲೀಷ್‌ನ್ನು ಬೆಳೆಸುವ ಉದ್ದೇಶದಿಂದ ಶಾಲೆಯಲ್ಲಿ ಕ್ರಿಸ್ಮಸ್ ರಜೆಯ ಅವಧಿಯಲ್ಲಿ ಯು.ಪಿ. ತರಗತಿಯ ಆಸಕ್ತ ಮಕ್ಕಳಿಗೆ ಒಂದು ವಾರದ ಕಾಲ Spoken English  ತರಗತಿಯನ್ನು ನಡೆಸಲಾಯಿತು. ನಮ್ಮ ಶಾಲಾ ಹಳೆವಿದ್ಯಾರ್ಥಿನಿಯರಾದ ಕುಮಾರಿ ಸರಸ್ವತಿ.ಡಿ. ಹಾಗೂ ಕುಮಾರಿ ಕಮಲಾಕ್ಷಿ.ಪಿ.ಯವರು ಜಂಟಿಯಾಗಿ ಈ ತರಗತಿಯ ಸಂಪನ್ಮೂಲ ವ್ಯಕ್ತಿಗಳಾಗಿ ಭಾಗವಹಿಸಿದರು.ಶಾಲಾ ಮುಖ್ಯೋಪಾಧ್ಯಾಯರು ತರಗತಿಯನ್ನು ಉದ್ಘಾಟಿಸಿ ಇಂಗ್ಲೀಷ್ ಕಲಿಕೆಯ ಔಚಿತ್ಯವನ್ನು ವಿವರಿಸಿದರು.ಬೆಳಗ್ಗೆ 10.00 ರಿಂದ  ಮಧ್ಯಾಹ್ನ 12.15 ರ ತನಕ ನಡೆದ ತರಗತಿಯಲ್ಲಿ ಮಕ್ಕಳಿಗೆ ಸಂದರ್ಭಕ್ಕನುಸಾರವಾಗಿ ವಾಕ್ಯ ರಚನಾ ಕೌಶಲ,ಸರಳ ವ್ಯಾಕರಣ ಹಾಗೂ ಎಲ್.ಸಿ.ಡಿ ಯಲ್ಲಿ ಸೂಕ್ತ ಸಿ.ಡಿ.ಗಳ ಪ್ರದರ್ಶನವನ್ನು ಮಾಡಲಾಯಿತು. 

                     ಸಹವಾಸ ಶಿಬಿರ ಡಿಸೆಂಬರ್.23 & 24

                               
         ಡಯಟ್ ಮಾಯಿಪ್ಪಾಡಿಯ ಅಧ್ಯಾಪಕ ವಿದ್ಯಾರ್ಥಿಗಳು 4 ನೇ ತರಗತಿಯ ಮಕ್ಕಳಿಗೆ ವಿಶೇಷವಾಗಿ ಆಯೋಜಿಸಿದ ಎರಡು ದಿನಗಳ ಸಹವಾಸ ಶಿಬಿರವು ಡಿಸೆಂಬರ್ ತಿಂಗಳ 23 ಮತ್ತು 24ನೇ ತಾರೀಕಿನಂದು ಸ್ವರ್ಗ ಸ್ವಾಮೀ ವಿವೇಕಾನಂದ ಶಾಲೆಯಲ್ಲಿ ಜರಗಿತು.ರಕ್ಷಕ - ಶಿಕ್ಷಕ ಸಂಘದ ಅಧ್ಯಕ್ಷ ಶ್ರೀ ವಿವೇಕಾನಂದ ಬಿ.ಕೆಯವರ ಅಧ್ಯಕ್ಷತೆಯಲ್ಲಿ ಸಮಾರಂಭವನ್ನು ವಾರ್ಡ್ ಸದಸ್ಯ ಶ್ರೀ ರವಿ.ಕೆ ಯವರು ನವೀನ ರೀತಿಯಲ್ಲಿ ಉದ್ಘಾಟಿಸಿದರು.
           ಹಲವು ತರದ ಆಟಗಳು, ಹಾಡು-ಕುಣಿತ, ಪ್ರಯೋಗ, ಗಣಿತ,ಪರಿಸರ, ಭಾಷೆ, ಸಿ.ಡಿ. ಪ್ರದರ್ಶನ. ಶಿಬಿರಾಗ್ನಿಯೇ ಮುಂತಾದ ಹಲವು ಚಟುವಟಿಕೆಗಳಲ್ಲಿ ಅಧ್ಯಾಪಕ ವಿದ್ಯಾರ್ಥಿಗಳ ಜತೆಯಲ್ಲಿ ಶಿಬಿರಾರ್ಥಿಗಳು ಬಹಳ ಸಂತೋಷದಿಂದ ಭಾಗವಹಿಸಿದರು. ಡಯಟ್ ಮಯಿಪ್ಪಾಡಿಯ ಉಪನ್ಯಾಸಕರಾದ ಶ್ರೀಯುತ ಶಶಿಧರ ಸರ್‌ರವರು ಎರಡು ದಿನವೂ ನಮ್ಮೊಂದಿಗಿದ್ದು ಸಂಪೂರ್ಣ ಜವಾಬ್ದಾರಿಯನ್ನು ಹೊತ್ತ ಅಧ್ಯಾಪಕ ವಿದ್ಯಾರ್ಥಿಗಳನ್ನು ತೆರೆಮರೆಯಿಂದ ವೀಕ್ಷಿಸುತ್ತಿದ್ದರು. ಶಿಬಿರಾರ್ಥಿಗಳು,ಅಧ್ಯಾಪಕರು, ಅಧ್ಯಾಪಕ ವಿದ್ಯಾರ್ಥಿಗಳು, ಮುಖ್ಯೋಪಾಧ್ಯಾಯರು, ಉಪನ್ಯಾಸಕರು ತಮ್ಮ ಅನುಭವಗಳನ್ನು ಹೇಳುವುದರೊಂದಿಗೆ ಶಿಬಿರ ಸಮಾಪನಗೊಂಡಿತು.
                                                             

       ನಮ್ಮ ಶಾಲೆಯಲ್ಲಿ ಇಪ್ಪತ್ತೈದು ವರ್ಷಕ್ಕೂ ಅಧಿಕ ಕಾಲ ಮಧ್ಯಾಹ್ನದ ಬಿಸಿಯೂಟ ತಯಾರಿಯ ಜವಾಬ್ದಾರಿ ಹೊತ್ತಿದ್ದ ಶ್ರೀಯುತ ಅಚ್ಚುತ ಭಟ್ ಸಜಂಗದ್ದೆ ಅವರು ಅನಾರೋಗ್ಯದಿಂದ ಬಳಲುತ್ತಿದ್ದ ನಿಮಿತ್ತವಾಗಿ ತಾರೀಕು 30/11/2011 ರ ಬುಧವಾರ ಶಾಲಾ ಶಿಕ್ಷಕ -ರಕ್ಷಕ ಸಂಘ ಹಾಗೂ ಮಾತೃ ಸಂಗಮಗಳ ವತಿಯಿಂದ ಸಂಗ್ರಹಿಸಿದ ರೂ.20000/- ವನ್ನು ಶಾಲಾ ಮುಖ್ಯೋಪಾಧ್ಯಾಯರು ಅವರ ನಿವಾಸಕ್ಕೆ ತೆರಳಿ ಶ್ರೀಯುತರಿಗೆ ಹಸ್ತಾಂತರಿಸಿದರು. ಶಾಲಾ ಅಧ್ಯಾಪಕರು, ಸಿಬ್ಬಂದಿಯೊಂದಿಗೆ ರಕ್ಷಕ - ಶಿಕ್ಷಕ ಸಂಘದ ಅಧ್ಯಕ್ಷರಾದ ಶ್ರೀಯುತ ವಿವೇಕಾನಂದ ಬಿ.ಕೆ.ಯವರು ಜೊತೆಗಿದ್ದರು.

      ನಮ್ಮ ಶಾಲೆಯಲ್ಲಿ ಡಿಸೆಂಬರ್ 8 ನೇ ತಾರೀಕಿನಂದು ಸಾಯಂ ಗಂಟೆ 6.30 ರಿಂದ ಕಾಸರಗೋಡಿನ ಕಿರಣ್‌ರಾಜ್ ಹಾಗೂ ರಾಜೇಶ್ (ವಿದ್ಯಾರ್ಥಿಗಳು) ರವರು ನಿರ್ದೇಶಿಸಿ ಅಭಿನಯಿಸಿದ ಕಿರುಚಿತ್ರ ಕಾವಳ ಪ್ರದರ್ಶನಗೊಂಡಿತು. ನಮ್ಮೀ ಸಂಸ್ಥೆ ಹಾಗೂ ನೆರೆಯ ಮಾತೃಭೂಮಿಸಂಘಟನೆಯವರು ಜಂಟಿಯಾಗಿದ್ದು ಕೊಂಡು ಈ ಕಾರ್ಯಕ್ರಮವನ್ನು ಏರ್ಪಾಡಿಸಲಾಯಿತು.
         ಹೆಣ್ಣು ಮಕ್ಕಳ ಹದಿಹರೆಯದ ಸಮಸ್ಯೆಗಳು, ಮೊಬೈಲ್ ಫೋನಿನ ದುರುಪಯೋಗ, ಜೀವನವನ್ನೇ ಅಂಧಕಾರ ದತ್ತ ಕೊಂಡೊಯ್ಯುವ ವೇಶ್ಯಾವಾಟಿಕೆ, ಪರಿಣಾಮವಾಗಿ ಅನುಭವಿಸ ಬೇಕಾದ ಏಡ್ಸ್ ನಂತಹ ಮಹಾಮಾರಿ ರೋಗಗಳು ವೀಕ್ಷಕರ ಹೃದಯವನ್ನು ತಟ್ಟಿದವು. ತಮ್ಮ ಮಕ್ಕಳನ್ನು ಹೇಗೆ ಬೆಳೆಸಬೇಕು ಎಂಬುದರ ಬಗ್ಗೆ ಎಚ್ಚರಿಕೆ ನೀಡಿತು. ಬಹುಸಂಖ್ಯೆಯಲ್ಲಿ ಭಾಗವಹಿಸಿದ ಪ್ರೇಕ್ಷಕರು ಚಿತ್ರದ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದರು.
       ಶಾಲಾ ಮುಖ್ಯೋಪಾಧ್ಯಾಯ ಕೆ.ವೈ.ಸುಬ್ರಹ್ಮಣ್ಯ ಭಟ್ ಚಿತ್ರದ ಬಗ್ಗೆ ಪ್ರಾಸ್ತವಿಕ ನುಡಿಗಳನ್ನಾಡಿ ಸಿನೆಮಾಕ್ಕೆ ಚಾಲನೆಯಿತ್ತರು. ನಿರ್ದೇಶಕ ಕಿರಣ್‌ರಾಜ್ ತಮ್ಮ ಅನಿಸಿಕೆಗಳನ್ನು ವ್ಯಕ್ತಪಡಿಸಿದರು.ರಕ್ಷಕ ಶಿಕ್ಷಕ ಸಂಘದ ಅಧ್ಯಕ್ಷರು, ಮಾತೃಭೂಮಿ ಸಂಘದ ಪದಾಧಿಕಾರಿಗಳು ವೇದಿಕೆಯಲ್ಲಿ ಉಪಸ್ಥಿತರಿದ್ದರು.ಸಂಗ್ರಹವಾದ ರೂಪೈ 2000/- ವನ್ನು ದೇಣಿಗೆಯಾಗಿ ನೀಡಲಾಯಿತು.

    ನಮ್ಮೀ ಶಾಲೆಯ ಮಾತೃ ಸಂಗಮದ ಸದಸ್ಯೆರಾದ ಶ್ರೀಮತಿ ಅನುರೂಪಾ ಕೆದಂಬೈಮೂಲೆ ಹಾಗೂ ಶ್ರೀಮತಿ ಅರ್ಚನಾ ಪೆರಿಕ್ಕಾನ ಇವರು ಸ್ವತ: ಆಸಕ್ತಿಯಿಂದ ಏಳನೇ ತರಗತಿಯ ಮಕ್ಕಳಿಗೆ ವೃತ್ತಿ ಪರಿಚಯ ಸಮಯದಲ್ಲಿ ಹೊಲಿಗೆ ತರಗತಿಯನ್ನು ಆರಂಭಿಸಿರುತ್ತಾರೆ.ಪ್ರತಿ ಸೋಮವಾರ ಹಾಗೂ ಮಂಗಳವಾರಗಳಲ್ಲಿ ಒಂದೊಂದು ಪೀರಿಯಡ್‌ನ್ನು ಹೊಲಿಗೆ ತರಬೇತಿಗಾಗಿ ವಿನಿಯೋಗಿಸಲಾಗಿದೆ.ಆಸಕ್ತಿಯಿರುವ ಮಾತೆಯರಿಗೆ ಶನಿವಾರ ಹಾಗೂ ಆದಿತ್ಯವಾರಗಳಲ್ಲಿ ತರಗತಿ ನಡೆಸುತ್ತಿದ್ದಾರೆ.

ಕಳೆದ ಶೈಕ್ಷಣಿಕ ವರ್ಷವು ಜೈವ ವೈವಿಧ್ಯ ವರ್ಷವಾಗಿದ್ದು, ನಮ್ಮ ಶಾಲೆಯಲ್ಲಿ ಕೃಷಿ ಚಟುವಟಿಕೆಗಳಿಗೆ ಹೆಚ್ಚಿನ ಪ್ರಾಧಾನ್ಯತೆ ನೀಡಲಾಗಿತ್ತು.
     ಶಾಲಾ ಮಕ್ಕಳೇ ಸ್ವತಃ ಅಧ್ಯಾಪಕರ ಮಾರ್ಗದರ್ಶನದೊಂದಿಗೆ ಕೈತೋಟ ನಿರ್ಮಿಸಿ ಅದರಲ್ಲಿ ವಿವಿಧ ತರದ ತರಕಾರಿ ಹಾಗೂ ಹಣ್ಣುಗಳ ಕೃಷಿಯನ್ನು ಬೆಳೆಸಲಾಗಿತ್ತು.ಸಾವಯವ ಗೊಬ್ಬರವನ್ನು ಮಾತ್ರ ಬಳಸಿಕೊಂಡು ಮಾಡಿದ ಈ ಕೃಷಿ ಮಕ್ಕಳ ಕಲಿಕೆಗೂ ಪ್ರೇರಣೆಯಾಗಿತ್ತಲ್ಲದೆ ಜೈವಿಕ ಕೃಷಿಗೂ ಮಾದರಿಯಾಗಿತ್ತು.ಕೇವಲ ಪಠ್ಯಚಟುವಟಿಕೆಗಳಲ್ಲದೆ ಪಠ್ಯೇತರ ವಿಷಯಗಳಿಗೂ ಪೂರಕವಾಗುವ ರೀತಿಯಲ್ಲಿ ಶಾಲಾ ಮುಖ್ಯೋಪಾಧ್ಯಾಯ ಕೆ.ವೈ.ಸುಬ್ರಹ್ಮಣ್ಯ ಭಟ್ ಹಾಗೂ ಇನ್ನಿತರ ಸಹ ಶಿಕ್ಷಕರು ರೂಪಿಸಿದ ಈ ಯೋಜನೆ ಫಸಲು ದೊರೆಯುವಲ್ಲಿ ಸಫಲವಾಗಿದೆ.ಮಾತ್ರವಲ್ಲದೆ ಶಾಲಾ ಆವರಣದಲ್ಲಿ  ನಿರ್ಮಿಸಿದ ಕೈ ತೋಟದ ತರಕಾರಿಯ ರುಚಿ ಮಕ್ಕಳ ಮಧ್ಯಾಹ್ನದ ಊಟಕ್ಕೆ ಬಳಕೆಯೂ ಆಗಿದೆ.

ನಮ್ಮಶಾಲಾ 4ನೇ ತರಗತಿಯ ವಿದ್ಯಾರ್ಥಿಗಳು ಸ್ಥಳೀಯ ಜಲಸಂಪನ್ಮೂಲ, ಪೆರಿಕ್ಕಾನದ ಬಳಿಯಿರುವ ನಿಸರ್ಗದತ್ತವಾದ ಝರಿಯನ್ನು ಸಂದರ್ಶಿಸಿದರು. ತರಗತಿಯ ಪಾಠಭಾಗದ ಅಂಗವಾಗಿ ಪ್ರವಾಸ ಕಥನ- ಬರೆಯೋಣ ಚಟುವಟಿಕೆಯ ಪೂರಕವಾಗಿ ಈ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿತ್ತು. ನೀರಿಗಾಗಿ ಕೊರೆದ ಸುರಂಗಗಳು,ಬೆಟ್ಟ ಪ್ರದೇಶದ ಕಡಿದಾದ ದಾರಿಗಳನ್ನು ಕ್ರಮಿಸಿ, ರಾಮಪತ್ರೆ, ಸಾಗುವಾನಿ,ಮಾವು,ಹಲಸು ಮುಂತಾದ ಕಾಡುಮರಗಳನ್ನು ನೋಡಿ ಮಕ್ಕಳು ಕಥನ ರಚನೆಗೆ ವಸ್ತುವಾಗಿಸಿಕೊಂಡರು. ಶಿಕ್ಷಕರಾದ ಸಚ್ಚಿದಾನಂದ.ಎಸ್ ಮತ್ತು ಮಿಥುನ್.ವಿ.ಆರ್. ನೇತೃತ್ವ ವಹಿಸಿದರು.

ಮಾಹಿತಿ ಹಕ್ಕು ಕಾಯಿದೆ -2005 

ವಿಶೇಷ ತಿಳುವಳಿಕಾ ಶಿಬಿರ ಮತ್ತು ಜನಪ್ರತಿನಿಧಿಗಳೊಂದಿಗೆ ಮುಕ್ತ ಸಂವಾದ.

       ನಮ್ಮೀ ಶಾಲೆಯಲ್ಲಿ ಸಾರ್ವಜನಿಕ ಅಗತ್ಯವನ್ನು ಮನಗಂಡು ಮಾಹಿತಿ ಹಕ್ಕು ಕಾಯಿದೆ ೨೦೦೫, ವಿಶೇಷ ತಿಳುವಳಿಕಾ ಶಿಬಿರವು ತಾರೀಕು ೧೬.೧೦.೨೦೧೧ನೇ ಆದಿತ್ಯವಾರ ಜರಗಿತು. ಈ ಶಿಬಿರದ ಉದ್ಘಾಟನಾ ಕಾರ್ಯಕ್ರಮದಲ್ಲಿ, ವಾರ್ಡು ಮೆಂಬರು ಶ್ರೀ ರವಿ.ಕೆ.ಯವರುಅಧ್ಯಕ್ಷ ಸ್ಥಾನವಹಿಸಿದ್ದರು.ಜಿಲ್ಲಾ ಪಂಚಾಯತು ಸದಸ್ಯ ಶ್ರೀ ಶಂಕರ ರೈ ಮಾಸ್ತರ್ ರವರು ಉದ್ಘಾಟಿಸಿದರು.
       ದಿನನಿತ್ಯ ನಡೆಯುವ ಸಾಮೂಹಿಕ ಗೊಂದಲಗಳು,ಭ್ರಷ್ಟಾಚಾರ ಸಂಬಂಧಿ ಕೆಲಸಗಳು, ಮಾಹಿತಿ ಹಕ್ಕು ಕಾಯಿದೆ ತಿಳುವಳಿಕೆಯಿಂದ, ಸಾಮೂಹಿಕ ಹೋರಾಟದ ಮೂಲಕ ತಡೆಯಲು ಸಾಧ್ಯ.ಈ ಔಚಿತ್ಯವನ್ನು ಮನಗಂಡು ಶಾಲೆಯಲ್ಲಿ ಈ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿದೆ ಎಂಬ ಪ್ರಾಸ್ತಾವಿಕ ನುಡಿಗಳೊಂದಿಗೆ ಶಾಲ ಮುಖ್ಯೋಪಾಧ್ಯಾಯ, ಶ್ರೀ ಕೆ.ವೈ.ಸುಬ್ರಹ್ಮಣ್ಯ ಭಟ್ಟರು ಕಾರ್ಯಕ್ರಮಕ್ಕೆ ಎಲ್ಲರನ್ನು ಸ್ವಾಗತಿಸಿದರು. ಸಾರ್ವಜನಿಕ ಕಾಮಗಾರಿಗಳು ನಡೆಯುವ ಸಂದರ್ಭದಲ್ಲಿ ಫಲಾನುಭವಿಗಳು ಅದರ ಕಡೆ ನಿಗಾ ವಹಿಸಿದಲ್ಲಿ Sಂಡಿತವಾಗಿಯೂ ಗುಣಮಟ್ಟವನ್ನು ಕಾಯ್ದುಕೊಳ್ಳಬಹುದು ಎಂಬ ಮಾಹಿತಿಯನ್ನು ಉದ್ಘಾಟಕ
ಶ್ರೀ ಶಂಕರ ರೈ ಮಾಸ್ತರರು ನುಡಿದರು. ಮುಖ್ಯ ಅತಿಥಿಗಳಾಗಿ ಭಾಗವಹಿಸಿದ ಪಂಚಾಯತು ಉಪಾಧ್ಯಕ್ಷೆ ಶ್ರೀಮತಿ ಆಯಿಷಾರವರು ಮಾಹಿತಿಹಕ್ಕು ಕಾಯಿದೆಯು ನಮಗೆ ಕೊಟ್ಟ ವಿಶೇಷ ಅವಕಾಶದ ಅಡಿಯಲ್ಲಿ ವಿವರಗಳನ್ನು ತಿಳಿದುಕೊಂಡು ಸ್ಪಂದಿಸಿದಲ್ಲಿ ನಿರೀಕ್ಷಿತ ಗುಣಮಟ್ಟದ ಕೆಲಸಕಾರ್ಯಗಳು ಸಾಧ್ಯ. ಈ ನಿಟ್ಟಿನಲ್ಲಿ ಎಲ್ಲರೂ ಜೊತೆಯಾಗೋಣ ಎಂಬ ಆಶಯ ವ್ಯಕ್ತಪಡಿಸಿದರು. ಇರ್ನ್ನೋವ ಮುಖ್ಯ ಅತಿಥಿ ಬ್ಲೋಕ್ ಪಂಚಾಯತು ಸದಸ್ಯ ಶ್ರೀ ರಾಮಕೃಷ್ಣ ರೈ ಕುದ್ವರವರು ತನ್ನ ಅಧಿಕಾರ ವ್ಯಾಪ್ತಿಯಲ್ಲಿ ನಡೆಯುವ ಕಾಮಗಾರಿಯ ವಿವರವನ್ನು ತಿಳಿಸಿದರು. 

 ಅಧ್ಯಕ್ಷ ಶ್ರೀ ರವಿ.ಕೆ.ಯವರು ಸಾಂದರ್ಭಿಕವಾಗಿ ಮಾತುಗಳನ್ನಾಡಿದರು.ಕುಮಾರಿ ಮಾಲವಿಕಾ ಸಜಂಗದ್ದೆ ನಿರ್ವಹಿಸಿದ ಈ ಕಾರ್ಯಕ್ರಮದಲ್ಲಿ ಹಿರಿಯ ಅಧ್ಯಾಪಕ ಶ್ರೀ ಶಿವರಾಮ ಭಟ್ಟರು ನುಡಿನಮನಗಳನ್ನು ಸಲ್ಲಿಸಿದರು.
ಎರಡನೇ ಅವಧಿಯಲ್ಲಿ ಚುನಾಯಿತ ಜನಪ್ರತಿನಿಧಿಗಳೊಂದಿಗೆ ಮುಕ್ತ ಸಂವಾದ ನಡೆಸಲಾಯಿತು. ಇದಕ್ಕೆ ಪೂರಕವಾಗಿ ಜಿಲ್ಲಾ ಕುಟುಂಬಶ್ರೀ ಘಟಕಗಳ ಕೋರ್ಡಿನೇಟರ್ ಶ್ರೀ ಸಿ. ರಾಜಾರಾಮ್ ಅವರು ಮಾಹಿತಿ ಹಕ್ಕು ೨೦೦೫ ರ ಸವಿಸ್ತಾರ ವಿವರಗಳನ್ನು ನೀಡಿದರು. ನೋಸರ್ ಇಂಡಿಯಾ ಅಧ್ಯಕ್ಷ ಶ್ರೀ ಮ್ಯಾಥ್ಯೂ ರವರು ವಿವಿಧ ದೃಷ್ಟಾಂತಗಳೊಂದಿಗೆ ವಿಷಯವನ್ನು ಪುಷ್ಟೀಕರಿಸಿದರು.  ಜಿಲ್ಲಾ ಸಣ್ಣ ಕೈಗಾರಿಕಾ ಘಟಕದ ಕಾಂiiದರ್ಶಿ ಶ್ರೀರಾಜಾರಾಮ್ ಪೆರ್ಲ ರವರು ಮೋಡರೇಟರ್ ಆಗಿ ಸಹಕರಿಸಿದರು. ಸಾರ್ವಜನಿಕರ ಕುಂದು ಕೊರತೆ ಸಂಶಯಗಳನ್ನು ಚುನಾಯಿತ ಪ್ರತಿನಿಧಿಗಳು ನಿವಾರಿಸುವಲ್ಲಿ ಯಶಸ್ವಿಯಾದರು. ಬಹುಸಂಖ್ಯೆಯಲ್ಲಿ ಂದಿದ್ದ ಸಾರ್ವಜನಿಕರು ಉತ್ಸಾಹದಿಂದ ಭಾಗವಹಿಸಿದರು.ಕಾರ್ಯಕ್ರಮದ ಕೊನೆಯಲ್ಲಿ ಪಂಚಾಯತು ಅಧ್ಯಕ್ಷ ಶ್ರೀ ಸೋಮಶೇಖರ.ಜೆ.ಎಸ್. ಸಹಿತ ಎಲ್ಲಾ ಜನಪ್ರತಿನಿಧಿಗಳು ಭ್ರಷ್ಟಾಚಾರ ಮುಕ್ತ ಆಡಳಿತಕ್ಕೆ ಬದ್ಧ ಎಂಬ ಪ್ರತಿಜ್ಞೆಯನ್ನು ಕೈಗೊಂಡಿದುದು ಕಾರ್ಯಕ್ರಮದ ಒಟ್ಟು ಯಶಸ್ವಿಗೆ ಹಿಡಿದ ಕೈಗನ್ನಡಿಯಾಗಿದೆ.